香蒜韓粉炒紅蝦

好中意食海鮮，但出街食好貴，唯有辛苦d，自己煮，又可以多料d，又冇味精！

以前整過幾次粉絲蟹煲，都好好食！之不過整蟹實在太太太麻煩！

想快d有得食？粉絲蝦就可以了！

今次又選用韓國粉絲，貪佢唔易碎又煙un。唔同泰國粉絲，韓粉唔可以只用水浸，要落熱水煮淋。

材料：
1.  紅蝦/中蝦8隻
2. 韓國粉絲半包
3. 蒜頭4-5粒（切蓉）
4. 雜胡椒碎1茶匙
5. 豉油2湯匙
6. 韓國豬肉汁（有少辣）

步驟：
1. 蝦解凍，開邊，去腸去沙囊
2. 煮熟韓粉，剪適當長短，用油撈勻
3. 起鑊，落油，煎蝦至半熟
4. 加油，爆蒜蓉，落粉絲
5. 炒鬆粉絲，落2湯匙水，落胡椒碎，豉油同豬肉汁，炒至水乾蝦熟，上碟

如果有芫荽，會仲香！

自家製_放鬆茶包

相信，大家都係爸媽心中的寶貝，都係被父母捧在手心長大的！

日子一天天過去，我地長大成人，父母亦漸漸變老…

長大後，出到社會工作，賺錢比家用，父母面上的笑容，並不在乎錢銀多少，而係孩子長大了，佢地感到安慰！

人老左，身體一定亦會漸漸退化。現在父母應該係處於人生的收成期，係享福的時候，所以我最關心佢地的健康！

媽媽開始步入更年期，經常睡不好！一家人都擔心！

在網上找了許久，都不知有甚麼可以幫到她。最後，找到芳姐，她的網站教了用炒麥米，炙甘草和圓肉做茶包，可改善因更年期引起的失眠和出汗。

我就照做了，希望有用！！！

黑椒海鹽大大蝦

琴日本身就想整乾煎黑椒蝦，但係諗到要挑成斤蝦的腸，就有d卻步～～

岩岩經過阿信屋，去759，有時就好似尋寶咁，佢有d貨唔係長期有，凍櫃更加係！

今次就比我遇到野生大蝦，Yeah!
9折之後係$21x，有5隻，隻隻有前手臂咁長～有2隻肥d，3隻瘦d

琴晚就煎左肥的^_^ 爆膏呀！又冇雪藏味～

材料:
1. 大大蝦2隻
2. 即磨黑椒，1茶匙
3. 海鹽，半茶匙
4. 生粉，4茶匙

步驟:
1. 解凍，放係水喉下啤水，3-5分鐘
2. 抹乾蝦身，剪去長鬚及眼。用剪刀剪開蝦背及蝦頭的殼，再係蝦背落刀，將蝦一分為二
3. 清除蝦腸及蝦頭沙囊
4. 用廚房紙抹乾水份
5. 平均灑上黑椒和海鹽，最後灑上生粉，尤其有膏的地方
6. 燒紅煎pan，落油，落蝦，肉向下。
7. 煎到金黃反轉煎殼，留意蝦頭是否已熟。
8. 搞掂，食得！

如果想知道蝦頭熟未，我自己就用搵筷子插入蝦頭的膏內，因為熟左的膏係香的，生的係腥的，一聞就知道！

Iherb·STASH花草茶～甘草香料味

上次講到買左STASH花草茶雜錦味，除左本身試過的檸薑味，其他都未試過～

試新野呢～有時好易“奶野”！

就好似呢4隻，唉～
味道一般之外仲唔襟沖！最恐怖係，飲落去有藥水味，OMG!

試到第5隻，甘草香料味，d味聞落有d怪，但飲落，㗳真d，有回甘，喉嚨好舒服！有層次！

心情都好d呀！

小器的皮膚/_\

Post左上一篇野，話Curel令皮膚好左，但由於本人皮膚極之小氣

下巴

生左N粒暗瘡仔，N粒醞釀中……

我衰衰皮膚的新救星 · Curel

好多人都有皮膚問題。

而我，除左皮膚衰之外，仲有樣冇法解釋的問題:小氣！皮膚都會小氣？！係堅的！

我好有信心，share左呢編野之後，我皮膚又會發一陣脾氣！

點小氣法？
唉，通常皮膚冇生粒粒，有返d光澤，家人朋友就會話:咦～你皮膚好左wor....
每次當我聽到呢一句，心諗“大鑊鳥”，皮膚又會開始走下坡！

話說我上星期去左台北，去左西門町ge巴黎草莓shopping。

見到Curel，記得以前睇人地d blog，好似去親日本都要入貨咁，佢又寫明係乾燥敏感肌用，我正正就係因為乾->出油->毛孔塞->粉刺->暗瘡，每日上演，絕無欺場！

我本身想一次過掃哂成條line，但理智話我知，就算係乾燥敏感配方都係有機會唔岩用的！

第一日，買左乳液。
-- 當晚，好驚喜！
-- 其實佢好水又好推，擠一下，可以查晒成塊面。好薄，但又保到水！滿意滿意！

第二日，買埋化妝水（I）。
-- 又係好用，唔會笠！
-- 本來想買埋落妝，但巴黎草莓賣晒=_=
-- 本來又想買埋洗面泡泡，但醒起剛買左舊洗面皂，因而放棄～

第三日，買埋落妝。
--係屈記買的，ok好用，冇驚喜！

之後返到香港，咦，見到Curel洗面泡泡做promo，嘩49蚊有90ml，平到呢！

第一日，買左1支試下，好用
第二日，買左5支上倉
第三日，由於係可以用到2019年ge關係，又買左6支

嗯嗯…
我知有d誇張，但係我諗到，一年的洗面錢都只不過係588蚊，我覺得自己慳左好多錢！！！

12支，夠了，唔好再行萬0同屈記！！！

總括而言，用左8日，皮膚已經冇狂出油，暗粒亦漸漸減少，兩邊面脥亦再冇出現明顯笑紋～

再遇花草茶～

話說我極唔喜歡飲水，
小時候，媽媽迫我要飲完一大杯水先準出門口……真的，試過飲到嘔！

長大，我冇變！
但知道飲水好重要，最重要係當個人缺水，皮膚就唔靚！

想要d水變好飲，當然要加d味！

茶葉

茶，變左我救星！

我喜歡中茶，黑·白·紅·青·綠·烏龍 茶都喜歡！
三十年的普洱，非常滑，非常醇！
還有龍井，那豆香味，非其他茶葉能夠媲美！

我亦喜歡西茶，尤其加了不同草本水果口味的！好玩又清新！

不過，西茶，少了中茶的回甘·餘韻。雖然如此，始終office用茶包比泡茶方便好多好多！我最後選擇了西茶！

以前我係飲Dilmah，佢香味夠，但喝下去，就是紅茶味。沒有果味！而且，除了雜錦口味（禮盒裝）有獨立包裝，其他都是一大包的，香味keep不到，所以漸漸就沒買這牌子。

然後，由於中醫介紹，我飲了一段日了的檸檬薏米水。

直到上個月，到了沙田一家西餐廳，吃了下午茶，嚐到一壼檸檬薑茶，“正”到呢！

佢清新，香味，口味夠又不太辣！我最怕飲薑茶，會辣死我！
但呢款茶，口味適中，I like it！
當堂映底，上網搵！

Search…STASH

係iherb搵到！Yeah！
必買檸薑味！再買雜錦味！
睇下仲有冇“正”野比我發掘到！

簡單中的學問

涼瓜菜甫蛋已做過N咁多次，但最成功可算係今次！

成功係邊？就係今次的蛋煎得好靚仔！

爆菜甫唔可以太多油，炒涼瓜亦唔需要好多油，但係蛋就唔同！冇油，蛋就炒唔起炒唔靚！

所以要係炒好菜甫同涼瓜後加油，即落蛋液。

因為油未係好熱，所以唔會面頭燶左而入面未熟！然後，再慢慢煎好一面再返另一面，咁就又鬆化又香口！

簡單ge一道菜，原來都要用腦用心去煮先成功！

盛放的黃玫瑰

之前睇到人地整，嘩，好令呀！
我就心思思跟人整，諗住將d芒果切薄d，整多幾層，會更加令……

點知，一將d啫哩水倒落去……
靚靚ge花花散開左…嗚……

我終於明白點解人地整d花咁迫，迫到成個杯都係，原來係用黎固定形狀。

但係，我又唔中意成杯都係芒果肉wor…

我一定會再整，整到滿意為止！

泡菜海鮮煲

呢個係肥媽教的，但佢ge版本係有豆腐同海鮮雜錦。我試過跟足黎做，得泡菜味，冇海鮮味。始終海鮮雜錦太過“流料”！

所以我決定改一改，因為呢個係唯一一個湯家裏某人願意飲=_=

材料:
1. 泡菜50g
2. 雪藏蝦10隻
3. 急凍韓國蠔5隻
4. 芋絲5件
5. 瀨尿蝦乾5條
6. 迷你娃娃菜4棵

步驟:
1. 解凍蝦和蠔。蝦去腸用胡椒粉及鹽撈一撈。蠔用生粉洗好，都係用胡椒粉及鹽醃吓。
2. 娃娃菜浸洗，芋絲同瀨尿蝦乾沖水備用。
3. 500水，落泡菜及瀨尿蝦乾，煲好湯底。
4. 煲15分鐘，落蝦蠔，滾起幾分鐘再落菜，再滾起，就食得！

呢個泡菜海鮮煲我一粒鹽都冇落，好鮮好好味！

小菜幾碟～

OL美顏飲

大件事: 醫師同我講, 其實而家d藥房唔係想像中咁乾淨, OL美顏飲都係煲佢幾分鐘先焗安全d, 如果唔係患左慢性腸炎就大鑊了!!!!


女人唔補好易老!!!

唉~聽日生日, 屈指一算已經20有7了...好快就到3字...個樣比以前真係變左好多...老左!!!
真係要"的"起心肝keep吓!

keep, 唔係咁簡單的! 身材(本身已經唔係好=_=)唔好走樣之餘, 樣更加唔可以殘!
尤其係皮膚, 身體唔好, 用咩貴價保養品都吸收唔到啦!
所以, 係時候開始補養身子啦!

好多人一聽到個補字, 就會諗到花膠呀, 燕窩呀咁。其實平野都可以幫到我地!

OL美顏飲

材料﹕南棗1-2粒, 圓肉4-5粒, 杞子10-12粒

工具﹕茶包1個, 500ml真空保溫壺1個

方法﹕南棗開半, 所有材料沖沖水, 入茶包, 放入真空保溫壺, 加大約500ml熱水, 焗至少半個鐘

功效﹕

南棗--滋腎養肝、健腦安神、補脾養胃、活血強心、養顏烏髮

杞子--滋補肝腎，益精明目

圓肉--養血安神

其實呢個茶好多人都適合飲, 因為南棗同杞子都唔燥, 而圓肉份量都唔多, 如果平時火氣大或者熱底人士, 可以減少或者唔加圓肉! 仲有呀, 記得當有傷風感冒或者女士period時候就唔好飲啦!

檸檬薏仁水

呢排真心覺得身子唔好, 都諗住睇下中醫, 始終覺得中醫可以由根本著手, 調理身子。

個幾星期前, 誤打誤撞睇左個女醫師, 佢真係好好...

醫師/醫生點為之好呢?

我自己覺得:

1. 醫得好我(咁梗係啦=_=)

2. 肯同我講點醫法

3. 態度友善

中醫嘛...要知有冇用...要一d時間的...

難得ge係佢肯答我好多問題:

我係咩底子?我食e樣果樣得唔得?我應該點做先可以養好身子??等等好多問題!

佢都一一解答, 仲係講到我明果隻...我學到好多野!!!

之前我有睇過其他中醫, 連我問我係咩底子都唔答, 淨係開藥方...

今次呢個檸檬薏仁水都係佢叫我飲的, 可以健脾止瀉，利水除濕, 好岩春天飲!

因為懶ge關係, 我搵下有冇薏仁粉...咁唔使成日煲又要拎返公司咁麻煩...

搵吓搵吓, 比我搵到易珈生技的薏仁水, 仲專登係台灣訂返黎!

薏仁水並唔係好飲ge東東...既然我係為左身體健康, 就要確保唔係飲埋d冇益ge野落肚, e.g.農藥

當我見到佢有證書驗過多種重金屬同農藥都合格, 我就放心買...

要知道而家香港市面上充斥住好多"強國"食品...真係唔小心都唔得!

而家我每日都飲....

首先係屋企用純天然去除蔬菜水果農藥清洗液(個名好長=_=)洗好2粒檸檬, 切去頭尾(可以放係雪櫃吸味or放水煲煲水做清潔), 1粒檸檬切6片, 咁2粒就有12片,用保鮮紙包住放玻璃密實盒帶返公司。1日3片, 可以飲4日。

1包薏仁粉沖到500ml, 用暖水沖好再放檸檬。好清新, 好香檸檬味!!!

又玩靚靚甲貼

原來貼側邊係難過貼中間。

靚靚吉蒂貓甲貼

無無聊聊玩指甲 >.<

《樂生園》龜苓茶

大前日想飲橙汁，就拎左支大樽的橙色果汁……點知～飲落去係芒果汁 ⊙＿⊙””

心知不妙！白痴仲拎左大樽，倒左佢又唔捨得，成18個大洋架！！！

好啦飲晒，明知濕熱都飲晒，等住“懶”野！ 當晚，濕疹發/_\……從未試過訓訓下痕醒！要起身查野！唉…仲大鑊係…生暗瘡，不少於10粒°■°，天呀！之前ge工夫浪費晒！

琴日，終於去買涼茶飲，問下店員姐姐，濕熱飲咩好？答案:龜苓茶。

好啦，咕咕咕，飲左一碗，好彩唔係好難飲！中午買一支細樽龜苓茶，夠2次飲。琴晚叮熱飲左去訓，嘩！一覺訓天光，冇痕醒！Yeah～～～

今朝咋咋淋再去買！希望醫好濕疹同暗瘡！

下次買咩都要睇清楚先，唉！

超大蝦乾炒蒜蓉芥蘭+ 韓國豬骨醬豬肋骨

靚靚甲貼

生活有時好無聊, 如果可以整d新"花神", 唔單止可以解吓悶, 有時仲可以比身邊ge人眼前一亮ge感覺!

前幾日同好朋友行葵涌廣場, 係間細鋪仔前面見到有好多e d甲貼wor, 50蚊有3大張, 抵呀!!!

左揀右揀, 揀左呢3張! 花花就想新年幫呀媽整, 其他2款比自己。

玩左幾次, 叫做有少少心得啦!

直接貼係指甲上, 再查面油, 比查左甲油再貼 =>冇咁易爛

好玩又靚靚, 快d試吓啦!!!