檸檬薏仁水

呢排真心覺得身子唔好, 都諗住睇下中醫, 始終覺得中醫可以由根本著手, 調理身子。

個幾星期前, 誤打誤撞睇左個女醫師, 佢真係好好...

醫師/醫生點為之好呢?

我自己覺得:

1. 醫得好我(咁梗係啦=_=)

2. 肯同我講點醫法

3. 態度友善

中醫嘛...要知有冇用...要一d時間的...

難得ge係佢肯答我好多問題:

我係咩底子?我食e樣果樣得唔得?我應該點做先可以養好身子??等等好多問題!

佢都一一解答, 仲係講到我明果隻...我學到好多野!!!

之前我有睇過其他中醫, 連我問我係咩底子都唔答, 淨係開藥方...

今次呢個檸檬薏仁水都係佢叫我飲的, 可以健脾止瀉，利水除濕, 好岩春天飲!

因為懶ge關係, 我搵下有冇薏仁粉...咁唔使成日煲又要拎返公司咁麻煩...

搵吓搵吓, 比我搵到易珈生技的薏仁水, 仲專登係台灣訂返黎!

薏仁水並唔係好飲ge東東...既然我係為左身體健康, 就要確保唔係飲埋d冇益ge野落肚, e.g.農藥

當我見到佢有證書驗過多種重金屬同農藥都合格, 我就放心買...

要知道而家香港市面上充斥住好多"強國"食品...真係唔小心都唔得!

而家我每日都飲....

首先係屋企用純天然去除蔬菜水果農藥清洗液(個名好長=_=)洗好2粒檸檬, 切去頭尾(可以放係雪櫃吸味or放水煲煲水做清潔), 1粒檸檬切6片, 咁2粒就有12片,用保鮮紙包住放玻璃密實盒帶返公司。1日3片, 可以飲4日。

1包薏仁粉沖到500ml, 用暖水沖好再放檸檬。好清新, 好香檸檬味!!!

又玩靚靚甲貼

原來貼側邊係難過貼中間。

靚靚吉蒂貓甲貼

無無聊聊玩指甲 >.<

《樂生園》龜苓茶

大前日想飲橙汁，就拎左支大樽的橙色果汁……點知～飲落去係芒果汁 ⊙＿⊙””

心知不妙！白痴仲拎左大樽，倒左佢又唔捨得，成18個大洋架！！！

好啦飲晒，明知濕熱都飲晒，等住“懶”野！ 當晚，濕疹發/_\……從未試過訓訓下痕醒！要起身查野！唉…仲大鑊係…生暗瘡，不少於10粒°■°，天呀！之前ge工夫浪費晒！

琴日，終於去買涼茶飲，問下店員姐姐，濕熱飲咩好？答案:龜苓茶。

好啦，咕咕咕，飲左一碗，好彩唔係好難飲！中午買一支細樽龜苓茶，夠2次飲。琴晚叮熱飲左去訓，嘩！一覺訓天光，冇痕醒！Yeah～～～

今朝咋咋淋再去買！希望醫好濕疹同暗瘡！

下次買咩都要睇清楚先，唉！

超大蝦乾炒蒜蓉芥蘭+ 韓國豬骨醬豬肋骨

靚靚甲貼

生活有時好無聊, 如果可以整d新"花神", 唔單止可以解吓悶, 有時仲可以比身邊ge人眼前一亮ge感覺!

前幾日同好朋友行葵涌廣場, 係間細鋪仔前面見到有好多e d甲貼wor, 50蚊有3大張, 抵呀!!!

左揀右揀, 揀左呢3張! 花花就想新年幫呀媽整, 其他2款比自己。

玩左幾次, 叫做有少少心得啦!

直接貼係指甲上, 再查面油, 比查左甲油再貼 =>冇咁易爛

好玩又靚靚, 快d試吓啦!!!

Aubrey Organics Pure Aloe Vera +Japan Gals Sonic Mini

前幾年開始興起導出導入機，話可以清潔肌膚，又可以收毛孔同令肌膚吸收更多爽膚水同精華素，既加強美容效果，又唔會浪費護膚品（雖然我用ge都係平民野, 但都唔好浪費嘛）。

講到咁正，我就入左支HITACHI Hada CRiE CM-N810。用左年幾，除左覺得導出唔錯（每次化妝棉都變得黃黃咁），皮膚質素並冇明顯好左。自從睇左羅摩2篇文章﹕《導入機最強解說。上之超聲波導入篇》同埋《導入機最強解說。下之離子導入篇》，就知道點解皮膚冇好到 =_='''

羅摩ge意思就係話用離子唔係唔得，之不過大部份產品都配合唔到佢ge功能，因為當護膚品唔係離子化，即使用離子導入都係唔得ge。咁我果1年幾就係白做 =_= ... ... 唉... ...

而超聲波機，佢ge導入原理完全唔同，佢係可以夾硬將d爽膚水or精華素導入真皮層。咁就搞掂？未住，因為就好似羅摩咁講，導入機係唔識分護膚品中ge成份邊d好邊d唔好。所以一定要揀安全ge護膚品, 安全就不外乎係：有機+天然。

所以之前就係iherb買左支Aubrey Organics, Pure Aloe Vera, 4 fl oz (118 ml) USD$6.76@，呢支係98％有機成分，100％純天然成分，QAI有機認證，係從經過認證的有機蘆薈葉中提取，冇用人工增稠劑。成份包括﹕庫拉索蘆薈（蘆薈）葉汁，柚（葡萄柚）提取物，瓜爾豆瓜爾豆膠（瓜），生育酚（維生素E）。

見我成日用蘆薈？因為蘆薈真係好野黎！蘆薈可以：

1. 增強人體皮膚的保濕
2. 加速皮膚曬傷復完
3. 提升皮膚骨膠原份量

(From羅摩)

我ge皮膚"好有性格", 成日無端端生幾粒瘡出黎... ...我自己又衰手痕，成日擠佢，又多傷口又多印... ...用左Aubrey Organics Pure Aloe Vera +Japan Gals Sonic Mini， 印淡得快d，皮膚平滑左，心情真係好左，開心左！