顯示具有 HEA住煮 標籤的文章。 顯示所有文章
顯示具有 HEA住煮 標籤的文章。 顯示所有文章

2014年6月3日 星期二

簡單中的學問

涼瓜菜甫蛋已做過N咁多次,但最成功可算係今次!

成功係邊?就係今次的蛋煎得好靚仔!

爆菜甫唔可以太多油,炒涼瓜亦唔需要好多油,但係蛋就唔同!冇油,蛋就炒唔起炒唔靚!

所以要係炒好菜甫同涼瓜後加油,即落蛋液。

因為油未係好熱,所以唔會面頭燶左而入面未熟!然後,再慢慢煎好一面再返另一面,咁就又鬆化又香口!

簡單ge一道菜,原來都要用腦用心去煮先成功!

盛放的黃玫瑰

之前睇到人地整,嘩,好令呀!
我就心思思跟人整,諗住將d芒果切薄d,整多幾層,會更加令……
點知,一將d啫哩水倒落去……
靚靚ge花花散開左…嗚……
我終於明白點解人地整d花咁迫,迫到成個杯都係,原來係用黎固定形狀。
但係,我又唔中意成杯都係芒果肉wor…
我一定會再整,整到滿意為止!

2014年5月21日 星期三

泡菜海鮮煲

呢個係肥媽教的,但佢ge版本係有豆腐同海鮮雜錦。我試過跟足黎做,得泡菜味,冇海鮮味。始終海鮮雜錦太過“流料”!
所以我決定改一改,因為呢個係唯一一個湯家裏某人願意飲=_=
材料:
1. 泡菜50g
2. 雪藏蝦10隻
3. 急凍韓國蠔5隻
4. 芋絲5件
5. 瀨尿蝦乾5條
6. 迷你娃娃菜4棵
步驟:
1. 解凍蝦和蠔。蝦去腸用胡椒粉及鹽撈一撈。蠔用生粉洗好,都係用胡椒粉及鹽醃吓。
2. 娃娃菜浸洗,芋絲同瀨尿蝦乾沖水備用。
3. 500水,落泡菜及瀨尿蝦乾,煲好湯底。
4. 煲15分鐘,落蝦蠔,滾起幾分鐘再落菜,再滾起,就食得!
呢個泡菜海鮮煲我一粒鹽都冇落,好鮮好好味!

2013年11月11日 星期一

焗孜然鹽麴雞軟骨

每次去食串燒必叫雞軟骨,又香又脆,好正!但閒閒地都要6-7蚊串,得果幾粒,有d貴!如果自己整,去凍肉舖買一磅都係廿幾蚊,有一大盆,就唔使就住就住咁食la!

自己整係超簡單的,只要有光波爐/焗爐,冇?鑊同油有喇掛?!我就中意用光波爐,見住d油份不斷迫出黎,又唔使開火,岩晒怕肥ge懶人!

材料:
1. 急凍雞軟骨(1磅)
2. 鹽麴(2大匙)
3. 孜然粉(1茶匙)

步驟:
1. 雞軟骨解凍洗淨晾乾水,放入食物膠袋,落鹽麴,撈勻,放雪櫃醃過夜。

2. 取出雞軟骨,沖走鹽麴(因鹽麴易燶),用廚房紙吸乾水。

3. 放烤網入光波爐,250度預熱3分鐘,放雞軟骨,改為200度,焗20分鐘,間中返吓。用低溫慢慢迫d油出黎。

4. 最後灑上孜然粉,光多1,2分鐘,就搞掂!

2013年11月4日 星期一

蒜蓉西蘭花帶子拼磨菇洋蔥汁豬扒

成日都係燒汁, 真係煮到悶。
試吓其他汁, 果然容易又好味。

材料﹕
1. 豬扒 (3件)
2. 洋蔥 (1個)
3. 磨菇 (1盒)
4. 鹽麴 (3匙)
5. 豉油 (3匙)


步驟﹕
1. 豬扒前一日用鹽麴醃好放雪櫃。 煮前拎出待溫度降至室溫,放入光波爐, 230度15分鐘, 中途返一返。(豬扒厚薄不同,時間未必完全一樣,光至全熟即可)

2. 光豬扒時,將洋蔥切小丁,磨菇切片。燒紅鑊落油炒洋蔥丁至透明有香味,加磨菇片炒至軟身。加豉油,炒勻。

3. 磨菇洋蔥汁煮好時,豬扒應已降溫, 肉汁就唔會係切時流出。將豬扒切粗條, 淋上磨菇洋蔥汁。配菜可以隨意, 呢次我配左蒜蓉西蘭花帶子。

肥肥邊爐大餐

天氣涼左,打邊爐就最適合不過,睇住電視慢慢食,正到呢!!!!


2013年10月19日 星期六

光波黑啤豬肋骨

呢個又係睇y_blog學返黎,y_blog真係有好多有心人成日post食譜同人分享,令到我呢類入煮新手行少好多冤枉路,亦令家人有好野食。但好可惜,y_blog要摺了……
黑啤豬肋骨好有風味,好似去左德國餐廳咁。整埋德國咸豬手就更正!!!

材料:
1. 急凍豬肋骨(1條,如前手臂連手掌咁長)
2. 洋蔥(1個)
3. 黑啤(3/4罐)
4. 雜香草(1匙)
5. 蒜蓉(2匙)
6. 鹽(1.5匙)
7. 冰糖碎(1.5匙)
8. 車厘茄(10數粒)

步驟:
1. 豬肋骨解凍,洗淨,切成2條。洋蔥切粒。 所有材料放入袋中,醃一晚。

2. 焗之前將豬肋骨拎出黎,掃走肉上的醃料,免得焗果時整焗焦左。

3. 250度,焗15mins。其間要反一次。車厘茄要反得密d,因為易熟易焦,唔想太熟,可以後5分鐘先加。如果想有甜味,就焗好時掃蜜糖就得!

***呢個食譜我唔係照哂人地ge做,所以有出入,如果下次改左方法做會好食d,就再update啦!如果對呢個煮法有任何睇法,希望有心人會指點一二。

2013年10月17日 星期四

光波鹽麴雞膇

呢個係睇《鬼嫁料理手帳》( http://oniyomeryori.blogspot.hk/?m=1 ) 學返黎架!佢好叻,希望有日我都可以學到佢咁煮到一手好餸!

吉吉島d美國雞膇好靚,我成日買。

醃料:
1. 鹽麴(2匙)

材料:
1. 雞膇(6隻)

汁料:
1. 蜜糖(1匙)
2. 燒汁(2匙)
將蜜糖同燒汁攪勻

步驟:
1. 煮之前一日用鹽麴醃好。
2. 放光波爐燒,220度每隔3-4分鐘掃蜜糖燒汁,大約25分鐘就有得食架啦!




















自從用左呢個方法,整雞膇就未失手過,之前成日比人話唔夠味/_\,而家呢?次次話好好味!!!多謝鬼嫁!!!


2013年9月6日 星期五

光波三文魚骨

有行開吉吉島超市的都會見過一包包三文魚骨連魚尾 。果日越多三文魚刺身,三文魚骨同三文魚頭就越平 。呢日買左一包,只係23蚊左右,做左一魚兩味(魚湯+燒焗魚骨),兩樣都好易做,亦好快做好,當然,亦都好好味啦!
材料:
1. 三文魚骨(1包)
2. 蕃茄(1個)
3. 薯仔(1個)
步驟:
1. 洗好魚骨魚尾,晾乾水 。幼骨剪一段段,魚鰭亦剪出黎,用黎燒焗 。而魚尾同魚骨用黎滾湯 。
2. 光波爐高架鋪錫紙掃油,放上幼骨段和魚鰭,200度,一邊滾湯,一邊要留意,間唔時返一返,焗到金黃骨脆為止 。
3. 燒紅鑊,落油,落魚尾魚骨煎到兩面金黃 。呢個時候就去切薑同薯仔 。
4. 煎好之後,落薑,落大滾水 。滾起放薯仔,滾20分鐘,滾ge時候切蕃茄 。
5. 落蕃茄再滾5分鐘,落鹽調味,搞掂 。
6. 湯搞掂時,軟骨應該都ok 。灑上椒鹽就完成 。
非常簡單又有營養ge一魚兩味,我個米飯班主都話好正!

2013年9月4日 星期三

光波鹽麴蒜香骨

鹽麴呢樣調味料剛為香港師奶所熟悉,我都係睇網上d食譜認識佢。成日都想試,因為網上d人比佢ge評價好高,但佢好難買到=_= 終於皇天不負有心人,幫襯開ge金飯碗糧油雜貨店有賣,即刻買一包 。試過之後,每次醃肉一定唔少得佢 。
材料:
1. 腩排(12兩)
2. 鹽麴(1湯匙)
3. 蒜頭(1個)
步驟:
1. 腩排洗好晾乾水
2. 蒜頭去衣切成蓉( 溫馨提示1) ,加1湯匙鹽麴,落腩排撈一撈,放雪櫃醃一晚 。
3. 開光波爐,將腩排平均放高架,200度,每10分鐘反一反,見到金黃色就搞掂(溫馨提示2)
溫馨提示:
1. 網上有買幾蚊一個磨蓉器,可以磨到出晒汁,好好用
2. 落左鹽麴易d燶,小心睇住!真係怕燶可以焗之前整走d鹽麴先 。

2013年9月3日 星期二

冬瓜花生眉豆煲雞腳

唔知大家有冇聽過或者睇過「 芳姐保健湯餸 」( www.healthy-food.hk )?我成日都會睇,亦不時留言問芳姐 。佢超好,亦有料,有幾次身體唔舒服都係照住佢教我ge方法好返,真係好多謝佢!
最近佢教煲呢個湯,我試過,價錢平又容易煲之餘仲好好味 。想去濕去腫一定要試試啦!
材料:
1. 冬瓜(半斤)
2. 眉豆,花生(各2兩)
3. 雞腳(6隻)
4. 薑(1 片)
步驟:
1. 雞腳出水,過冷河,剪腳甲
2. 冬瓜切塊,不需去皮 。洗淨眉豆花生,將所有材料放入煲 。
3. 大火煲滾,轉小火煲個半鐘
溫馨提示:
去街市好難買到一斤冬瓜,因為好難切咁薄 。既然係咁,可以所有材料X2,咁一次過煲,飲2日,用少d燃料嘛!

2013年8月30日 星期五

光波燒魷魚鬚

以前買餸,好多時都會去街市,夏天中午去買餸真係熱到成身汗,好辛苦。但係返工附近開左吉吉島,Yeah!有時就會去買,買開發覺有d野係吉吉島d日本超市係特別d同平d。
今次啲魷魚鬚係一田買的,特價一包26蚊咋!Siumi米飯班主食左話好似新鮮咁好味咁彈牙 。下次見到特價一定要買多幾包存倉,哈哈!
材料:
1.魷魚鬚(一包)
2.燒汁(2湯匙)
步驟:
1.拆開魷魚鬚包裝,洗乾淨,一開二,晾乾水
2.開光波爐,用高架,放好魷魚鬚,較250度,15分鐘,中間要反同埋掃燒汁
3.時間可加減,燒到魷魚鬚層皮開始甩就得啦